ତାତିଲେ ଭୋଟ୍ ଦାନରୁ ବଞ୍ଚିତ ଥିବା ଆଦିବାସୀ, ଅଟକ ରଖିଲେ ବିଡ଼ିଓଙ୍କୁ

ସୂଚନା ପ୍ରକାରେ ପାତ୍ରପୁର ବ୍ଳକର ତୁମ୍ବା ପଞ୍ଚାୟତ ଅନ୍ତର୍ଗତ ଧାଡିଆମ୍ବ ଆଦିବାସୀ ଗ୍ରାମର ଲୋକଙ୍କ ଭୋଟର ତାଲିକାରେ ନାମ ନଥିବାରୁ ଭୋଟ ଦାନରୁ ଗ୍ରାମବାସୀ ବଞ୍ଚିତ ହୋଇଥିଲେ । ଏହାକୁ ନେଇ ଲୋକଙ୍କ ଭିତରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ଗତ ୨୦ ତାରିଖ ପଞ୍ଚାୟତ ନିର୍ବାଚନ ବଳେ ତୁମ୍ବା ପଞ୍ଚାୟତର ବୁଥ ନମ୍ବର ତିନିରେ ଭୋଟଦାନ ହୋଇଥିଲା । ଏହି ବୁଥରେ ଥିବା ଧାଡିଆମ୍ବ ଆଦିବାସୀ ଗ୍ରାମର ପ୍ରାୟ ୮୦ ଜଣ ଲୋକଙ୍କ ନାମ ଭୋଟର ତାଲିକାରେ ନଥିବାରୁ ଉତ୍ତେଜନା ପ୍ରକାଶ ପାଇଥିଲା । ଏହି କାରଣରୁ ଭୋଟଗ୍ରହଣ ତିନିଘଣ୍ଟା ପାଇଁ ବନ୍ଦ ରହିଥିଲା । ଭୋଟପେଢି ବ୍ଳକକୁ ନେବାକୁ ଲୋକେ ସୁଯୋଗ ଦେଇନଥିଲେ ଏବଂ ପୋଲିଂ ଦଳକୁ ଅଟକ ରଖିଥିଲେ । ଲୋକଙ୍କ ସମସ୍ୟାର ସମାଧାନ କରିବାକୁ ଲିଖିତ ପ୍ରତିଶ୍ରୁତି ଦେବା ପରେ ପୋଲିଂ ଦଳକୁ ଛାଡିଥିଲେ । ଏହାପରେ ଗ୍ରାମବାସୀ ବ୍ଳକ କାର୍ଯ୍ୟାଳୟକୁ ନିୟମିତ ଆସି ଗୁହାରି ଜଣାଉଥିଲେ । ଭୋଟର ତାଲିକାରେ ନାମ ନଥିବା ଜଣାଇଲେ ପୁନଃ ଭୋଟ ପାଇଁ ବ୍ୟବସ୍ଥା କରାଯିବ ବୋଲି ବିଡିଓ ସେତେବେଳେ କହିଥିଲେ । ସେମାନଙ୍କ ଭୋଟଦାନ ସମ୍ପର୍କରେ କି ପ୍ରକାର ନିଷ୍ପତ୍ତି ନିଆଗଲା ସେ ସମ୍ପର୍କରେ ଜାଣିବାକୁ ଗ୍ରାମବାସୀ ବିଡ଼ିଓଙ୍କୁ ଦେଖାକରିବାକୁ ପାତ୍ରପୁରକୁ ଆଜି ଆସିଥିଲେ । ହେଲେ ବିଡ଼ିଓ ଲୋକଙ୍କ ସହିତ ଆଲୋଚନା ନକରି ଅନ୍ୟ କାମରେ ଚାଲି ଯାଇଥିଲେ । ଏହାକୁ ନେଇ ଗ୍ରାମବାସୀ ଉତ୍ତେଜିତ ହୋଇପଡିଥିଲେ । ଗୋଷ୍ଠୀ ଉନ୍ନୟନ ଅଧିକାରୀ ତୁମ୍ବା ଯାଇଥିବା ଖବରପାଇ ବ୍ଳକ କାର୍ଯ୍ୟାଳୟରୁ ଫେରି ଲୋକେ ରାସ୍ତାରେ ଜଗି ରହିଥିଲେ ।