ବାଲେଶ୍ବର : ବାଲେଶ୍ବର ସହରାଞ୍ଚଳରେ ପୁରାତନ ତଥା ପ୍ରମୁଖ ଜଳାଶୟଗୁଡ଼ିକୁ ସରକାରୀ ଅନୁଦାନରେ ସଂସ୍କାର ବା ପୁନରୁଦ୍ଧାର କାମ କରୁଛି ପୌରପାଳିକା । ଏଥିପାଇଁ ୩ କୋଟି ୬୭ ଲକ୍ଷ ଟଙ୍କା ଖର୍ଚ୍ଚ କରାଯାଉଛି । ହେଲେ ଆବଶ୍ୟକ ସମୟ ସୀମା ମଧ୍ୟରେ ସମ୍ପୂର୍ଣ୍ଣ ହୋଇ ପାରୁନଥିବାରୁ ନିର୍ମାଣଧୀନ ଉକ୍ତ ଜଳାଶୟଗୁଡ଼ିକର ଅବସ୍ଥା ଯଥାପୂର୍ବ ତଥା ପର ଭଳି ଅବସ୍ଥା ହେବା ନେଇ ଆଶଙ୍କା ସୃଷ୍ଟି ହୋଇଛି । ଫଳରେ କୋଟିକୋଟି ଟଙ୍କାରେ ଚାଲିଥିବା ଏହି କାମ ଉପରେ ପ୍ରଶ୍ନବାଚୀ ସୃଷ୍ଟି ହୋଇଛି ।
ସେହିପରି ୨ ନମ୍ବର ୱାର୍ଡର ବଡ଼ଖୁଆ ପୋଖରୀ ଉନ୍ନତି ପାଇଁ ୧ କୋଟି ଟଙ୍କା ମଂଜୁର ହୋଇଥିଲା । ସେଥି ମଧ୍ୟରୁ ଠିକାଦାର ପ୍ରାୟ ୪୦ ଭାଗ କାମ ଶେଷ କରିଥିବା ଦେଖାଯାଇଛି । ତେବେ ଗୁରୁତ୍ବପୂର୍ଣ୍ଣ ବିଷୟ ହେଉଛି, ଏବେ ବର୍ଷାଋତୁ ଆରମ୍ଭ ହୋଇଥିବା ଯୋଗୁଁ ଜଳାଶୟ ସଂସ୍କାର କାମ ବନ୍ଦ କରାଯାଇଛି । ସହରବାସୀଙ୍କ ଅଭିଯୋଗ ହେଉଛି ଯେ ଯେତେବେଳେ ଗ୍ରୀଷ୍ମଋତୁ ଥିଲା ସମୟସୀମା ମଧ୍ୟରେ ଏହି କାମ ଠିକାଦାର ନିଶ୍ଚୟ ସାରି ପାରିଥାନ୍ତେ । ସମୟସୀମା ମଧ୍ୟରେ କାମ ନସରିବା ନେଇ କାର୍ଯ୍ୟର ସ୍ବଚ୍ଛତା ଉପରେ ପ୍ରଶ୍ନ ଉଠୁଛି । ଏ ସଂପର୍କରେ ୨ ମାସ ପୂର୍ବରୁ ଏକ ଖବର ପ୍ରକାଶ ପାଇବା ସହ ବର୍ଷା ପୂର୍ବରୁ କାର୍ଯ୍ୟ ସରିବା ନେଇ ଆଶଙ୍କା ପ୍ରକାଶ କରାଯାଇଥିଲା । କିନ୍ତୁ ପୌର କର୍ତ୍ତୃପକ୍ଷ ଏବଂ ଠିକାସଂସ୍ଥା ଜାଣିଶୁଣି ଏ କାମକୁ ବିଳମ୍ବ କରିବା ଏବଂ ଏ ବାବଦରେ ଖର୍ଚ୍ଚ ହେବାକୁ ଥିବା କୋଟିକୋଟି ଟଙ୍କାକୁ ଆତ୍ମସାତ କରିଛନ୍ତି ବୋଲି ସହରବାସୀ ଅଭିଯୋଗ କରିଛନ୍ତି । ଯାହାର ଫଳ ସ୍ବରୂପ ଏବେ ମୌସୁମୀ ବର୍ଷା ଆସି ଯାଇଥିବାରୁ ଉକ୍ତ କାମକୁ ବନ୍ଦ କରି ଦିଆଯାଇଛି ।
ସେପଟେ ପୌରାଧ୍ୟକ୍ଷା ସବିତା ସାହୁଙ୍କୁ ଏନେଇ ପଚାରିବାରୁ ଜଳାଶୟ ସଂସ୍କାର କାମ ବିଳମ୍ବ ହୋଇଥିବା ସେ ସ୍ବୀକାର କରିଥିଲେ । ବର୍ତ୍ତମାନ ବର୍ଷା ଦିନ ଆସୁଥିବାରୁ ଡ୍ରେନ ଓ ରାସ୍ତାକୁ ପ୍ରାଥମିକସ୍ତରରେ ଗୁରୁତ୍ବ ଦିଆଯାଉଥିବା ସେ କହିଛନ୍ତି । ତେଣୁ ପୋଖରୀ ଖୋଳାରେ ଠିକାଦାର ଯେତିକି କାମ କରିଛନ୍ତି ସେତିକିରେ ବିଲ୍ ପାସ୍ କରାଯିବ ବୋଲି ଶ୍ରୀମତୀ ସାହୁ ସ୍ପଷ୍ଟ କରିଛନ୍ତି ।