ବଣାଇ : ବଣାଇ ବନଖଣ୍ଡ କୋଇଡା ରେଞ୍ଜ ଅନ୍ତର୍ଗତ ଗିଡେଇ ଗଣୁଆ ନିକଟରେ ବନ୍ଦ ପଡିଥିବା ଟାଟା ଟିସ୍କୋ କମ୍ପାନୀ ଦ୍ଵାରା ପୂର୍ବରୁ ଅଧିକୃତ ଥିବା ଜଙ୍ଗଲ ଅଞ୍ଚଳରୁ ମାଙ୍ଗାନିଜ ଚୋରା ଚାଲାଣ ହେଉଥିବା ଖବର ପାଇ ଆଜି ଭୋର ସକାଳ ସମୟରେ କୋଇଡା ରେଞ୍ଜ ଅଧିକାରୀ କାଜଲ କୁମାରୀ ନାୟକଙ୍କ ନେତୃତ୍ୱରେ ଡେପୁଟି ରେଞ୍ଜର ବିଜୟ ତରାଇ, ଵନକର୍ମଚାରୀ ତୋଫାନ କୁମାର ତ୍ରିପାଠୀ, ଦୁଃଖୀ କିସାନ ସମେତ ସ୍କ୍ୱାର୍ଡ କର୍ମଚାରୀମାନେ ମିଳିତ ଭାବେ ଚଢ଼ାଉ କରିଥିଲେ । ଅଚାନକ ଚଢ଼ାଉ କରାଯିବା ଦେଖି ଚୋରା ଚାଲାଣରେ ସମ୍ପୃକ୍ତ ଥିବା ସମସ୍ତେ ଘଟଣା ସ୍ଥଳରୁ ଫେରାର ହୋଇଯାଇଥିଲେ । ଶେଷରେ ରେଞ୍ଜ ଅଧିକାରୀ ମାଙ୍ଗାନିଜ ବୋଝେଇ ହୋଇଥିବା ଗାଡ଼ିଟିକୁ ଜବତ କରି ରେଞ୍ଜ ଅଫିସକୁ ନେବା ସହିତ ଘଟଣାର ତଦନ୍ତ କରୁଥିବା ଜଣାପଡିଛି । ଜବତ ମାଙ୍ଗାନିଜର ମୂଲ୍ୟ ଲକ୍ଷାଧିକ ଟଙ୍କାରୁ ଅଧିକ ହେବ ବୋଲି ଆକଳନ କରାଯାଇଛି ।
