ଖେଳରେ ଖେଳରେ ବଳିଯାତ୍ରା

ଗ୍ରାମବାସୀଙ୍କ କହିବା ଅନୁସାରେ, ଏହି ପିଲାମାନେ ଗାଁର ଏକ ସ୍ଥାନରେ ବଳିଯାତ୍ରା କରିଥିଲେ । ପ୍ଲାଷ୍ଟିକ ବାଜା ବଜାଇ ଶୋଭାଯାତ୍ରାରେ ଆସିଥିଲେ । ଗାଁରେ ବୁଲୁଥିବା କୁକୁର ଛୁଆକୁ ‘ପାଟବୋଦା’ କରିଥିଲେ । ଶୁଲିଆ, ପାଟଖଣ୍ଡା ଓ କାନ୍ଦୁଲଯାତ୍ରାରେ ଦେଖିଥିବା ପୂଜା ପଦ୍ଧତି ଭଳି ପୂଜା ବି କରିଥିଲେ । ଶେଷରେ କୁକୁର ଛୁଆକୁ ବଳି ଦେଇ ଏହି ପିଲାମ‌ାନେ ରକ୍ତ ପିଇଥିଲେ । ଏହା ଜାଣିବା ପରେ ଚିନ୍ତିତ ହୋଇ ପଡ଼ିଥିବା ଲୋକେ ତୁରନ୍ତ ଏମାନଙ୍କୁ ଡାକ୍ତରଖାନାକୁ ନେଇଥିଲେ । ଏବେ ଏମାନଙ୍କ ଚିକିତ୍ସା ଚାଲିଛି । କୁକୁର କାମୁଡ଼ା ଇଂଜେକସନ୍‌ ଏଆର୍‌ଭି ଏମାନଙ୍କୁ ଦିଆଯାଉଛି । ତିନିଟି ଡୋଜ ଶିଶୁମାନେ ନେଇ ସାରିଥିବା ବେଳେ, ଆସନ୍ତା ୧୬ ତାରିଖ ଶେଷ ଡୋଜ ନେବେ ବୋଲି ଜଣାପଡ଼ିଛି ।

ବଲାଙ୍ଗୀର ଜିଲ୍ଲାରେ ପ୍ରତି ବର୍ଷ ଚାରିରୁ ପାଞ୍ଚଟି ସ୍ଥାନରେ ଶୁଲିଆ ଯାତ୍ରା ସହ ଗାଁରେ ଗାଁରେ ଆୟୋଜିତ ହୋଇଥାଏ ପାଟଖଣ୍ଡା ଓ କାନ୍ଦୁଲଯାତ୍ରା । ସବୁଠି ପଡ଼ିଥାଏ କୁଢ଼ କୁଢ଼ ବଳି । ବଳି ଦେଇ ସର୍ବସମ୍ମୁଖରେ ରକ୍ତ ପିଇଥାଏ ବରୁଆ । ଏସବୁ ଯାତ୍ରାରେ ଛୁଆଠୁ ବୁଢ଼ା ସମସ୍ତଙ୍କର ଭିଡ଼ ଜମିଥାଏ । ଏ ଭଳି ଯାତ୍ରାର ପ୍ରଭାବରେ ୫ ଜଣ ଶିଶୁ ପ୍ରଭାବିତ ହୋଇଥିବା ପଣ୍ଡରାପିଟା ଗାଁ ଲୋକ କହିଛନ୍ତି । ପଣ୍ଡରାପିଟାର ଏହି ଘଟଣାକୁ ଶିଶୁ ମଙ୍ଗଳ କମିଟି ଗୁରୁତର ସହ ନେଇଛି । ସଚେତନତା ସହିତ ପିଲାଙ୍କ ସ୍ୱାସ୍ଥ୍ୟକୁ ନେଇ ଅଧିକାରୀଙ୍କୁ ଅବଗତ କରାଯିବ ବୋଲି ଶିଶୁ ମଙ୍ଗଳ କମିଟିର ଅଧ୍ୟକ୍ଷ ଯୋଗେଶ୍ୱର ମହାନ୍ତି କହିଛନ୍ତି ।