Skip to content

Saturday, April 4, 2026

YouTube Videos
eNewspaper

Search

YouTube Videos
eNewspaper

Home
ରାଜ୍ୟ
ବୁଢ଼ାବଳଙ୍ଗରୁ ବେଧଡ଼କ ଚାଲିଛି ବାଲି ଚାଲାଣ

ରାଜ୍ୟ

ବୁଢ଼ାବଳଙ୍ଗରୁ ବେଧଡ଼କ ଚାଲିଛି ବାଲି ଚାଲାଣ

ବାରିପଦା : ମୟୂରଭଞ୍ଜ ଜିଲ୍ଲା ଦେଇ ପ୍ରବାହିତ ବୁଢ଼ାବଳଙ୍ଗ ନଦୀରୁ ବେଆଇନ ବାଲି ଉତ୍ତୋଳନ ଉପରେ ଲଗାମ୍‌ ଲାଗି ପାରୁନି । ଲିଜ୍‌ ଦିଆଯାଇଥିବା ବାଲିଘାଟରେ ବେଆଇନ୍‌ ବାଲି କାରବାର ହେଉଥିବା ବେଳେ ଲିଜ୍ ଦିଆଯାଇ ନ ଥିବା ଘାଟରୁ ମଧ୍ୟ ଦିନରାତି ବାଲି ଚୋରା ଚାଲାଣ କରାଯାଉଛି । ସରକାରୀ ବାବୁମାନଙ୍କ ଛତ୍ରଛାୟା ତଳେ ରହି ବାଲି ମାଫିଆମାନେ କୋଟି କୋଟି ଟଙ୍କାର ବାଲି ଚାଲାଣ କରୁଛନ୍ତି । ଯାହାର କୁପ୍ରଭାବ ନିକଟସ୍ଥ ଗାଁଗୁଡ଼ିକ ଉପରେ ପଡ଼ୁଛି । ପ୍ରାୟ ଶତାଧିକ ଗାଁ ନଦୀର ଆଁ ଭିତରକୁ ଚାଲିଯିବାର ଆଶଙ୍କା ସୃଷ୍ଟି ହୋଇଛି । ଶିମିଳିପାଳ ପାଦଦେଶ ବରେହିପାଣିରୁ ବୁଢ଼ାବଳଙ୍ଗ ନଦୀର ଉତ୍ପତ୍ତି ହୋଇଛି । ନଦୀଟି ସାରସକଣା, ବାଙ୍ଗିରିପୋ‌ଷି, ଶ୍ୟାମାଖୁଣ୍ଟା, ବାରିପଦା, ‌ବଡ଼ସାହି ଓ ବେତନଟୀ ବ୍ଲକ୍‌ ଦେଇ ପ୍ରବାହିତ ହେଉଛି । ନଦୀଜଳକୁ ବିଶୁଦ୍ଧ ପାନୀୟ ଜଳ ପ୍ରକଳ୍ପ ମାଧ୍ୟମରେ ଲୋକଙ୍କ ପାଖକୁ ପହଞ୍ଚାଯାଉଛି । ସେହିପରି ହଜାର ହଜାର ହେକ୍ଟର ଚାଷଜମିକୁ ଜଳସେଚନ ହୋଇପାରୁଛି । ତେବେ ନଦୀରୁ ବେଆଇନ ବାଲି ଉତ୍ତୋଳନ ଯୋଗୁ ଗତ କିଛି ବର୍ଷ ହେଲା ଲୋକମାନେ ପାନୀୟ ଉପଯୋଗୀ ଜଳ ପାଉ ନାହାନ୍ତି । ସେହିପରି ଚାଷଜମିକୁ ବି ପାଣି ମାଡ଼ି ପାରୁନାହିଁ । କାରଣ ମନଇଚ୍ଛା ବାଲି ଉତ୍ତୋଳନ ଓ ଚାଲାଣ କରାଯିବା ଯୋଗୁ ନଦୀଜଳ ପ୍ରଦୂଷିତ ହେବା ସହ ଜଳସ୍ତର ହ୍ରାସ ପାଉଛି । ନଦୀ ଉପରେ ଲୋକମାନେ ଗାଧୋଇବା ଅନ୍ୟ କାମ‌ରେ ନିର୍ଭର କରୁଥିବା ଯୋଗୁ ସମସ୍ୟା ଆହୁରି ଜଟିଳ ହୋଇଛି ।

ବୁଢ଼ାବଳଙ୍ଗ ନଦୀକୂଳ ଠାରୁ ଗୋଟିଏ କିଲୋମିଟର ଦୂରରେ ପାଖାପାଖି ୨୨୧ଟି ଏବଂ ଅଧ କିଲୋମିଟର ଦୂରରେ ପ୍ରାୟ ୭୮ଟି ଗାଁ ରହିଛି । ମାଫିଆଙ୍କ ମନଇଚ୍ଛା ବାଲି ଉତ୍ତୋଳନ ଫଳରେ ନଦୀ ନିକଟ ୧୦୫ ଗାଁ ପ୍ରତି ବିପଦ ସୃଷ୍ଟି ହୋଇଛି । ମେସିନ୍‌ ଲଗାଇ ନଦୀରୁ ବାଲି ଉତ୍ତୋଳନ ହେବା ଯୋଗୁ ନଦୀ ଗଭୀର ହେବା ସହ ବନ୍ଧ ଦୁର୍ବଳ ହେଉଛି । ତେବେ ବଡ଼ସାହି ଓ ବେତନଟୀ ବ୍ଲକ୍‌ର ୨୫ ରୁ ଅଧିକ ଗାଁରେ ଏହି ସମସ୍ୟା ଏବେ ଜଟିଳ ସ୍ଥିତିରେ ରହିଛି । ବର୍ଷାଦିନ ଆସିଲେ କିଏ ଘରଦ୍ବାର ଛାଡ଼ି ପରିବାର ସହ ଦୂର ଜାଗାକୁ ଯାଇ ରହୁଛନ୍ତି ତ ଆଉ କିଏ ବନ୍ଧୁବାନ୍ଧବଙ୍କ ଘରେ ରହିବାକୁ ଉଚିତ୍ ମଣୁଛନ୍ତି । ନେତା, ସରକାରୀ ଅଧିକାରୀ ଓ ବାଲି ମାଫିଆଙ୍କ ସଲାସୁତରା ପାଇଁ ମୟୂରଭଞ୍ଜର ଜୀବନରେଖା କୁହାଯାଉଥିବା ବୁଢ଼ାବଳଙ୍ଗ ଲୋକଙ୍କ ପାଇଁ ବିପଦ ସୃଷ୍ଟି କରିଛି । ଏହା ସହ ସରକାର ବି ବର୍ଷକୁ କୋଟି କୋଟି ଟଙ୍କାର ରାଜସ୍ବ ହରାଉଛନ୍ତି । ଅନ୍ୟପଟେ ମୟୂରଭଞ୍ଜରେ ଚାଲିଥିବା ବେଆଇନ ବାଲି ଉତ୍ତୋଳନ ଓ ଚାଲାଣ ଘଟଣାକୁ ଜାତୀୟ ଗ୍ରିନ୍ ଟ୍ରିବ୍ୟୁନାଲ୍‌ ଗୁରୁତ୍ବର ସହ ନେଇଛନ୍ତି । ନିର୍ଦ୍ଦେଶ ମତେ ୪ ଜଣିଆ କମିଟି ତଦନ୍ତ କରି ଟ୍ରିବ୍ୟୁନାଲ୍‌କୁ ରିପୋର୍ଟ ପ୍ରଦାନ କରି ସାରିଛନ୍ତି । ଯାହାକୁ ନେଇ ସରକାରୀ ଅଧିକାରୀ ଓ ନେତାମାନେ ଛାନିଆ ହୋଇ ପଡ଼ିଥିବା ବେଳେ ମାଫିଆଙ୍କ ଚିନ୍ତା ବଢ଼ିଛି । ତେବେ ଟ୍ରିବ୍ୟୁନାଲ୍‌ର ଛାଟ ବାଲି ଉତ୍ତୋଳନ ଓ ଚାଲାଣକୁ କେତେ ମାତ୍ରାରେ ରୋକି ପାରୁଛି, ତାହା ତ ଅଲଗା କଥା । ପ୍ରାଥମିକତା ଭିତ୍ତିରେ କିନ୍ତୁ ଲୋକଙ୍କ ସ୍ବାର୍ଥ ପାଇଁ ବୁଢ଼ାବଳଙ୍ଗ ନଦୀର ସୁରକ୍ଷା କରାଯିବାକୁ ବିଭିନ୍ନ ମହଲରେ ଉଦ୍ୟମ ହେବା ଜରୁରୀ ବୋଲି ମତ ପ୍ରକାଶ ପାଇଛି ।

Post navigation

ଭୁବନେଶ୍ବରରେ ଡ୍ରାଇଭର୍ ମହାସଂଘ ତରଫରୁ ବିଭିନ୍ନ ଦାବି ନେଇ ଆନ୍ଦୋଳନ

କାର୍ଯ୍ୟ କରୁନି ବିଜୁସେତୁ ଯୋଜନା, ବାଉଁଶ ପୋଲ ଭରଷା

Leave a Reply Cancel reply

Your email address will not be published. Required fields are marked *

Comment *

Name *

Email *

Website

Photo Gallery

ଫଟୋ ଗ୍ୟାଲେରୀ

ପିପିଲି ଗଣଧର୍ଷଣ ମାମଲା ରେ କଂଗ୍ରେସ ମାଗିଲା କୃଷି ମନ୍ତ୍ରୀ ପ୍ରଦୀପ ମହାରଥୀ ଙ୍କ ଇସ୍ତଫା

December 27, 2018

ଫଟୋ ଗ୍ୟାଲେରୀ

ନିଖିଳ ଓଡ଼ିଶା ଅଟୋଚାଳକ ମହାସଂଘ ର ବାର୍ଷିକ ଅଧିବେଶନ

December 27, 2018

ଫଟୋ ଗ୍ୟାଲେରୀ

ମହିଳା କଂଗ୍ରେସ ପକ୍ଷରୁ କୃଷି ଓ ପଶୁ ସଂପଦ ମନ୍ତ୍ରୀ ପ୍ରଦୀପ ମହାରଥୀ ଙ୍କ ବାସଗୃହ ଘେରାଉ

December 27, 2018

ଫଟୋ ଗ୍ୟାଲେରୀ

ଇ-କମର୍ସ କମ୍ପାନି ଗୁଡିକ ପାଇଁ ଫେବ୍ରୁଆରୀ ୧ରୁ ଲାଗୁ ହେବ ନୂଆ ନିୟମ ଅନଲାଇନ ମେଗା ସେଲରେ ପଡିବ ପୂର୍ଣ୍ଣଚ୍ଛେଦ.

December 27, 2018

Copyright © 2026

Theme by: Theme Horse

Proudly Powered by: WordPress