ସୂଚନାଯୋଗ୍ୟ ଯେ, ଜଳେଶ୍ବର ବ୍ଲକ୍ର ୩୫ଟି ପଞ୍ଚାୟତ ଅଧୀନରେ ୨୦୫ଟି ଗାଁ ଥିବାବେଳେ, ଏହିସବୁ ଗାଁରେ ଆଜି ସୁଦ୍ଧା ୩୫,୫୯୦ ପରିବାରକୁ ସରକାର କାମ ଯୋଗାଇବା ପାଇଁ ଜବ କାର୍ଡ ପ୍ରଦାନ କରିଛନ୍ତି । ଏହିସବୁ ଜବ୍କାର୍ଡ ଅଧୀନରେ ଲୋକସଂଖ୍ୟା ୮୧,୨୨୭ । ଉପରୋକ୍ତ ଜବ୍କାର୍ଡଧାରୀଙ୍କ ଉଦ୍ଦେଶ୍ୟରେ ଚଳିତ ୨୦୨୧-୨୨ ଆର୍ଥିକ ବର୍ଷରେ ବିଭିନ୍ନ ପଞ୍ଚାୟତରେ ଶହେରୁ ଊର୍ଦ୍ଧ୍ବ ପ୍ରକଳ୍ପର କାର୍ଯ୍ୟ ଶେଷ ହୋଇଥିବା କୁହାଯାଇଛି । ଶହେ ପ୍ରକଳ୍ପ ପାଇଁ ମାତ୍ର ୧୦୬୭୮ଟି ଜବକାର୍ଡ ଅଧୀନରେ ୧୮୩୬୩ ଜଣଙ୍କୁ କାମ ଯୋଗାଇ ଦିଆଯାଇଛି ।
ସେହି ଶ୍ରମିକଙ୍କ ପ୍ରାପ୍ୟ ବାବଦରେ ୭ କୋଟି ୧୧ ଲକ୍ଷ ୨୨ ହଜାର ଟଙ୍କା, ଅର୍ଦ୍ଧକୁଶଳୀ ଶ୍ରମିକଙ୍କ ପ୍ରାପ୍ୟ ୨୩ ଲକ୍ଷ ୬୫ ହଜାର ଟଙ୍କା ଓ ନିର୍ମାଣ ସାମଗ୍ରୀ କିମ୍ବା ମାଲ ବାବଦରେ ୨ କୋଟି ୨୪ ଲକ୍ଷ ୭ ହଜାର ଟଙ୍କା ସରକାର ପ୍ରଦାନ କରିବା କଥା । ତେବେ ଆଶ୍ଚର୍ଯ୍ୟର କଥା ବର୍ତ୍ତମାନ ସୁଦ୍ଧା ମଜୁରି ବାବଦରେ ସରକାର ୭ ଲକ୍ଷ ୬ ହଜାର ଟଙ୍କା, ଅର୍ଦ୍ଧକୁଶଳୀ ଶ୍ରମିକ ବାବଦରେ ୧୦ ଲକ୍ଷ ୫୯ ହଜାର ଓ ମାଲ ବାବଦରେ ୧କୋଟି ୬୦ ଲକ୍ଷ ଟଙ୍କା ବ୍ଲକ୍ କାର୍ଯ୍ୟାଳୟକୁ ମିଳି ନଥିବା କୁହାଯାଇଛି ।
ଫଳରେ ଶ୍ରମିକ ଓ ଅର୍ଦ୍ଧକୁଶଳୀ ଶ୍ରମିକମାନେ ମୂଲଟଙ୍କା ନପାଇ ଦୟନୀୟ ଅବସ୍ଥାରେ ରହିଛନ୍ତି । ସେହିପରି ଜଣେ ଜବ କାର୍ଡଧାରୀଙ୍କୁ ଅତିକମ୍ରେ ଶହେଦିନ କାମ ଯୋଗାଇବାକୁ ଯୋଜନାରେ ବ୍ୟବସ୍ଥା ଥିବା ବେଳେ ଆଶ୍ଚର୍ଯ୍ୟର କଥା ଜଳେଶ୍ବର ବ୍ଲକ୍ରେ ଚଳିତ ଆର୍ଥିକ ବର୍ଷରେ ମାତ୍ର ୬୬ଟି ପରିବାର ପୂରା ଶହେଦିନ କାମ ପାଇଛନ୍ତି । ସରକାରୀ ଧାର୍ଯ୍ୟ ମଜୁରି ଦର ମଧ୍ୟ ଅଳ୍ପ ରହିଥିବାରୁ ଏହି ଯୋଜନାରେ କାମ କରିବା ପାଇଁ ଧୀରେ ଧୀରେ ଲୋକଙ୍କ ଆଗ୍ରହ କମିବାରେ ଲାଗିଛି ।